Blog fach sydyn sy' gennai i chi'r tro 'ma.
Rwy' newydd ddod adre o Ganolfan y Celfeddydau yn Aber ar ol gweld sioe 'Burton' - sef sioe un-dyn sy'n rhoi rhyw olwg fach ar pwy oedd Richard Burton. Rhodri Miles sy'n actio ynddo, ac mae'n sioe anhygoel o dda - un o'r sioeau orau dwi wedi weld (nid fy mod yn mynd i weld y math yma o beth rhyw lawer - dydw i ddim yn un o'r 'lovey-darlings').
Fel crwtyn o gefn gwlad sy'n deall mwy am 'viewing' nac am 'reviewing', nai ddim eich diflasu chi gyda fy fersiwn i o 'adolygiad' - ond, fel rhywun sydd a diddordeb yn ser rhyngwladol Cymru (megis Huw Griffith, Richard Burton, Dylan Thomas, Peter Goginan ac wrth gwrs Grace Jones), rhaid i mi gyfadde i awr a chwarter di-doriad perfformiad Rhodri Miles hedfan heibio, ac hawdd iawn oedd anghofio ar adegau mae nid Burton ei hun oedd o'm blaen. A dweud y gwir, yn ystod rhai adegau pan roedd Rhodri wedi troi ei wyneb i ffwrdd rhyw gymaint, gan ein gadael a golwg o gefn ei ben, y cornel bach o wallt wedi gwynu o flaen ei glustiau, a cul-olwg o'r gwg ('w' to bach - h.y. frown yn saesneg) oedd ar wyneb Burton yn barhaol, roedd y tebygrwydd (yn enwedig tra'n gwrando ar y llais cras-felfedaidd, a'r acen 'rhyngwladol-Gymraeg') i'r seren o Bont-rhyd-y-fen yn un a oedd yn codi ias.
Mae gallu Rhodri Miles cystal os nad gwell a gallu Michael Sheen, sydd wedi cael cyfleoedd ar y teledu'n portreadu Tony Blair a Brian Clough. Yn sicr, mae'r sioe yma yn haeddu cael ei hystyried fel raglen/drama deledu, a Rhodri ddylsai serennu ynddi.
Bum yn ddigon ffodus o ysgwyd llaw a Rhodri ar ol y perfformiad, a sioc arall (er ei fod yn dal yn ei wisg a'i golur Burton) oedd gweld pa mor wahanol oedd Rhodri o ran ei bryd a'i wedd i'r cymeriad a fu'n portreadu am ddros awr yn gynharach. Dyna i chi stamp actor a twyllwr da.
Ewch i weld 'Burton'.
Fel teyrnged i'r sioe, i Rhodri, ac wrth gwrs i Richard Burton, mi fyddai'n prynu Aberteifi (Cardigan) felyn o 'Burtons' Aber yfory.
Reit, amser gwely nawr. Nos da.
No comments:
Post a Comment